سؤال مستفز بيلح على عقلى و طالب إجابة .. هى دى ثورة ؟؟؟
هل اللى حصل من يوم 25 يناير 2011 ثورة ؟؟ هى دى التسمية الصح يعنى ؟؟ مش انتفاضة ولا احتجاجات واسعة ولا غضب شعبى ولا أى حاجة من الكلام اللى ملوش معنى ده ؟؟ يعنى اسمها ثورة مش غير كده ؟؟
أشـــــــــــــــــــــــــــــــــــــــك ... أيوة انا اللى بقول كده .. انا اللى نزلت الشارع ولحد قبل الإنتخابات الرئاسية كنت فاكراها ثورة و حلم و امل و مستقبل .. ما صدقت يكون فى حاجة أتعلق بيها حتى لو قشة .. بس دلوقتى أنا متأكدة ان الحلم كان أكبر من اللازم و الآمال العريضة اللى اتبنت على ما يسمى الثورة كانت بزيادة اوى ..حملناها أكبر من طاقتها ... يمكن عشان احنا جيل بطل يعرف يحلم و نسى طعم الإنتصار .. و محصلش أى جديد فى حياته عدا حصول مصر على كأس الامم الأفريقية 3 مرات على التوالى
ويمكن برده عشان دى مواصفاة الجيل فمعرفش حتى يحافظ على الثورة اللى حيلته ... ضاعت منه زى كل حاجة .. سرقوها الجيل المأنتخ ..الجيل اللى هدم كل المبادىء والقيم ورسخ معنى البيروقراطية فى كل مؤسسة و كل مشروع وحتى فى كل بيت
طب ازاى ثورة ؟؟
اذا كان الشعب اللى خرج يوم 28 يناير رجع نصه لبيوتهم بعد الخطاب الأول و قبل بإقالة الحكومة وكأنه كان أقصى طموحهم ... ونص النص اللى فضل رجع لبيوتهم بعدالخطاب التانى و قبل بتعديل 3 مواد فى الدستور وعيط من كلام الأبوة اللى نقحت فجأة ... و نص الربع اللى قرر يستمر رجع لبيوتهم مع خطاب تكليف الجنرال بالمهمة ... وبرغم ان الشعب كله خرج تانى من بيوتهم بعد خطاب التنحى إلا انهم كانو برده مش مقتنعين باللى حصل ... ببساطة شعب متعودش يطلب حقه و فى نفس الوقت يرضى بالنتايج حتى لو مسعاش ليها ... طب وهى الثورات بيحصل فيها كده ؟؟ الثورات بتعمل فوضى عشوائية بهدف إعادة الحالة ما قبل قبل قبل الثورة ؟؟؟؟؟؟؟ الثورات بيتلعن أبوها و اللى عملوها ؟؟ الثورات بتنادى بهدم القانون والدستور ؟؟؟؟ تؤ تؤ تؤ أكيد دى حاجة تانية غير الثورة .. انا هسميها زعابيب ,,, زعبوبة يناير :(
