قلنا ثورة سلمية ... قلنا كرامة و عدالة وحرية .. قلنا كفاية ظلم و بهدلة وعنترية
أصلى مش بتاع زعيق ولا سباب وخناق .... أنا نفسى فى سلام وأمان من غير
كدب ونفاق
ضرب تانى لا .. من النهاردة هقاوم وهدافع عن شبابى اللى ضاع فى زحمة
متروالانفاق
لفيت كتير ودورت على نفسى وحاولت أبعد عن القهاوى و شلة الأفلام وقلة
الأخلاق
مش هكون زى صاحبى الى ركب البحر عشان العيش واللحمة ... فغرق والموجة عدت فوقيه من غير أى رحمة
ولا هكون زى جارى الغلبان ... شغال صبح وليل وضهر كمان . من ولاده محروم وعلى طول تعبان
لكن أنا هفضل هنا مهما شفت
فيكى وشربت من مرارك ... مهما اتذليت و
اتمرمطت مسيرى أوصل لأسرارك
بس خايف الاوان يفوت ... ويفضل صوتى زيه زي السكوت ... و لما أفكر أعلى فيه أكتر يطلع مكبوت
بس خايف الاوان يفوت ... ويفضل صوتى زيه زي السكوت ... و لما أفكر أعلى فيه أكتر يطلع مكبوت
برده مش هيئس وهفضل أحاول .... لحد ما يتأكدو انى مناضل ابن مناضل
ما هو أنا اللى صحيت كل يوم الصبح مش لاقى المية وانتى بلد النيل
أنا ابن الدويقة من كتر همى ودا مش ذنبى بقيت مجرم أصيل
أنا اللى وقفت طول النهار فى الإشارة
أبيع علب المناديل
أنا اللى لفيت فى شوارعك تايه حزين طول النهارو الليل
أنا اللى نزلت أسقط النظام الفاسد فى عز ما الدم كان بيسيل
عرفتى بقى انا ميـــــــــــــــــــــــــــــــــــــــــــــــن
أنا ابن أرضك اللى عمل الثورة
ودلوقتى بقى العميل
وبرغم كل حاجة هنكمل المشوار أصل جيلنا مش زى اى جيل
ليست هناك تعليقات:
إرسال تعليق